- Arbeidet med graving og grusing tek til i januar, og me satsar på at belysninga kjem på plass i midten av mars. Går alt etter planen vil løypa vera ferdigstilt i mai, seier leiar i Ølen grendautval, Anja Hauge Christiansen. 

Like før jul hadde initiativtakarane i grendelaget oppstartsmøte med entreprenørane. Dermed kan alle mosjonistar, skuleelevar, barnehageborn, seniorar, barselsgrupper og friluftsentusiastar gle seg til ny lysløype langs Osaelva til våren.  

I samband med utbygginga av spillvann-røyr frå Fatland, har kommunen opparbeida ei tursti med lys frå Steinbru og ned til idrettsanlegget. Grendeutvalet har tatt initiativ til, og ansvar for, den vidare turvegen som skal gå i fortsetjinga av denne stien. Løypa vil gå frå Steinbru, opp langs Osaelva, til Hedlevadvegen og deretter til Øvrehagen-vegen, der løypa vil følgja eksisterande gangveg. 

Det er altså 3,2 km av dei totalt 4 kilometerane som nå skal opparbeidast. Og det vil bli eit kjærkome tilbod i Ølen, meiner Christiansen. 

• Sjekk ut løypa her! Film frå "prøvetur" av ruta.

 - Mange har sakna ei sentrumsnær turløype i Ølen. Utanom asfalterte gang- og sykkelvegar, er det ingen alternativ til gode turvegar nær sentrum. Med den nye løypa langs Osaelva vil me få ein veg med skånsamt underlag som er opplyst heile året, og som i tillegg er eit lågterskeltilbod. Løypa vil vera tilrettelagt for både rørslehemma, rullestolbrukarar og barnevogner. I tillegg ligg turvegen lett tilgjengeleg for fleire sentrale bu-område, og nær skular og barnehagar, seier ho. 

Prislappen for turløypa er omlag 4,1 million kroner og allereie er mykje av potten på plass. Store delar av kostnadane er dekka gjennom spelemidlar, momsrefusjon og støtte frå små og store lokale bidragsytarar. 

- Me har fått utruleg god støtte frå ei rekkje sponsorar som har vore med å gjort det heile mogleg. I tillegg har det vore stor velvilje hjå grunneigarane langs løypa, seier Christiansen. 

Den økonomiske støtta kjem frå kommunen, Vindafjord Arbeidsgiverforum, Kjøttfestivalen, SR-stiftelsen, SØK, Etne Sparebank sitt Spira-fond, Fatland, Sparebank 1 SR-Bank og Ølensjøen Fus Barnehage. 

- Dette er også bidragsytarar som har vore viktige støttespelarar i heile prosjektfasen, ikkje berre økonomisk, seier Christiansen. Nå gjenstår det kun 100 000 kroner før heile løypa er finansiert. Og allereie er det mange som har støtta løypa gjennom digitalt spleiselag. 

- I november starta grendelaget ein Spleis for løypa, og til nå er det kome inn nærare 33 000 kroner frå over 40 bidragsytarar. Me er veldig glade og takknemlege for den positive responsen, og løypa blir endeleg realisert takka vera alle dei gode støttespelarane, både store bedrifter og einskilde privatpersonar, seier Christiansen.