Me ladar opp til #Tourdesvindafjords

Tour des Fjords syklar Vindafjord på kryss og tvers, torsdag og fredag. Bli med på folkefesten, og til alle som vil dela glimta sine frå sykkelfestivalen på sosiale media:  hugs å bruka #Tourdesvindafjords og #Tourdesfjords!

Av Kari Aakra, 16.mai 2015 (Oppdatert 27.mai)

Startskottet for årets Tour des Fjords går 27.mai med startstrek i Bergen. 28.mai går etappe 2 frå Jondal til Haugesund, 29.mai går etappe 3 frå Stord til Sauda. Dermed blir sykkelryttarane å sjå på vegane i store deler av Vindafjord.

Torsdag: Jondal - Haugesund

Ca kl. 16:15 passerer dei første syklistane forbi Ølen torsdag ettermiddag. 

I forkant blir det aktivt når lokale Tour des Fjords-entusiastar inviterer til sykkelfestival i Ølensvåg. Det blir sykkelrulle-turnering, ansiktsmaling, konkurranse i vedstabling, og trehjulsykkelløp. Catering Partner sørger for sal av mat og bedriftene i distriktet stiller med premiar og give-aways.

Fredag: Stord - Sauda  

På fredag går også tredje-etappen gjennom Vindafjord, denne gongen frå Stord med målstrek i Sauda. Frå Skjoldastraumen går løypa til Nedre Vats, deretter vidare på riksveg 46 mot Sandeid, gjennom Vikedal og Imsland. 

Ca. 16:30 fredag ettermiddag er ryttarane forventa å passera Vikedal. 

- Også her er grendalag og lokalbefolkninga oppfordra til å laga folkefest langs løypa. Eg trur syklistane kan få god drahjelp med stemninga langs vegen gjennom Vindafjord-bygdene her også, seier Asbjørn Moe i Fikse Næringsutvikling.

Alle deltakarar og publikummarar blir oppmoda til å ta i bruk hashtagane #Tourdesvindafjords og #Medvind24. Bilda vil bli publiserte på Medvind24 si facebook-side og nettside i løpet av morgondagen. Sleng også på #tourdesfjords og bilda kan hamna på TV2 sin eigen live-feed.  

Arrangørane ønska seg til Vindafjord

 I fjor stilte meir enn 150 born til sykkelfestivalen i Ølensvåg under rittet, og arrangørane håpar sjølvsagt på gode besøkstal også i år. 

 - Den endelege løypa blei nylig bestemt, og me er veldig glad for at rittet også i år skal gå forbi Ølensvåg, der me med god erfaring frå i fjor veit at publikum lagar skikkeleg folkefest og sikrar 17.mai-stemning langs vegen, seier  Moe.

Ruta for 2.etappen i årets ritt er blitt endra fleire gonger, og har også vore diskutert lagt utanom E134 gjennom Vindafjord. Men der sette faktisk arrangørane på sentralt hald ned foten: sjølvsagt måtte løypa gå forbi Ølensvåg. 

 - Me har fått tilbakemelding om at det var eit sterkt ønske frå representantar blant arrangørane om at løypa måtte gjennom Ølensvåg. Me trur nok arrangementet vårt her lokalt i fjor har gjort eit inntrykk, seier Moe. 

Også i år er det representantar frå ei rekkje bedrifter i Vindafjord som saman står i bresjen for den lokale sykkelfestivalen i samband med rittet. Med god støtte frå det lokale næringslivet stiller komiteen med premiar og ei rekkje aktivitetar i løpet av dagen. I år går etappen gjennom Vindafjord på ein vekedag, og programmet startar difor etterskulestart. Frå kl 15.00 til kl. 17.00 blir det folkefest ved Kiwi og Omega i Ølensvåg. Ryttarane passerer mellom 16:15 og 16:45.

 - Det vil bli konkurransar for både store og små born, og som sist vil også noko meir profilerte nærinsglivsaktørar bli utfordra på fart og balanse. Det blir sal av mat på område og sjølve rittet blir sendt live på storskjerm undervegs, seier Moe. 

 Etappe 2-løypa startar i Jondal og følgjer E134 gjennom Etne og Vindafjord til Knapphus, der ryttarane svingar av til riksveg 46 mot Nedre Vats, der løypa går vidare langs Tørresdalen mot Skjoldastraumen, deretter  Grinde og Aksdal der dei kjem tilbake på E134 mot Haugesund.