Ålreit er eit coaching- og kompetansesenter som tilbyr kurs og utdanning innan coaching i Bergen og på Haugalandet. Fokuset er på coaching innan sjølvutvikling og kommunikasjon både for privatpersonar og for leiarar i næringslivsroller.

- Informasjonsmøtet er like aktuelt for foreldre som bedriftsleiarar. Det blir eit generelt og uforpliktande møte om utdanningane me har til hausten, fortel dagleg leiar i Ålreit Coaching & kompetansesenter, Jan Otto Hovda.

Informasjonsmøtet som finn stad på Medvind Næringshage i Ølensvåg, er eit uforpliktande, gratis møte om studieprogramma og korleis ein jobbar i desse programma.

- Alle er velkomne, ein treng berre vere nysgjerrig på kva dette er for å stille. Ingen førehandsinformasjon er nødvendig, legg han til vidare.

Ålreit i kontorfellesskapet

I april i år flytta Ålreit Coaching & kompetansesenter inn i kontorfellesskapet i Medvind Næringshage i Ølensvåg. Frå Ølensvåg vil dei kunne tilby tenestane sine i større grad til marknaden i Vindafjord enn dei før har gjort.

- Her blir me sentralt tilgjengelege, og det blir enklare å møte personleg, seier Hovda som i utgangspunktet skal vere på kontoret i Ølensvåg to arbeidsdagar i veka.

Medrekna dagleg leiar, Jan Otto Hovda, er det fire tilsette i bedrifta som årleg gjennomfører både studieprogram og kurs innan coaching. Dei har alle utdanning som coachingtrenarar og har sertifiseringar innan coaching frå Den Norske Coachforening.