I tillegg til tradisjonelle programpostar som sjoarløp, auksjon og motortreff, blir Sjoargata krydra med endå meir handel dette året. 

- Dei siste åra har me opplevd stadig større interesse for salsboder og utstillarar under Sjoardagen, og dette året stiller mellom 15 og 20 aktørar med ulike produkt, seier Magne Christiansen i Handel i Ølen. 

Besøkstala til Sjoardagen har auka på dei siste åra, samstundes som programmet har vakse i omfang. Både store og små har endå fleire tilbod og aktivitetar i vente på Sjoardagen 2018:

Dei minste får tradisjonen tru æra av å opna dagen med Sjoarløpet. Dette året blir det også meir sirkus og magi for den yngre garde, med ballongtriks, ansiktsmaling  og tryllekunster frå mentalist Johan Ophaug. 

Auksjonen lokkar som vanleg med gode kupp, og om det fristar med ein eksklusiv rånetur, kan du få haik med Etne og Vindafjord Motorklubb. 

Kveldsarrangementet er også utvida med meir på programmet dette året. I samarbeid med Åkrafjorden Oppleving og Ølen Kulturhus er det duka for ein festleg avslutning på Sjoardagen med sommarcruise til Romsa, og deretter dans på kulturhuset– noko som allereie har vist seg å så særs godt an. 

- Sommarcruiset med White Lady til Romsa er allereie utseld, og med Pakkers og Podsoll på scenen reknar me med høg stemning og godt besøk på kulturhuset også, seier Christiansen. 

 - Målet med Sjoardagen er eit rimeleg lågterskeltilbod for alle aldrar, og dei siste åra har me bygd opp eit arrangement som verkeleg treff alle målgrupper. Sjoardagen er blitt tradisjon for mange.