Vel møtt til Over Fikse, 29. april! Foto: Fjeldheim Foto

- Fleire bedrifter både i Etne og Vindafjord, grendelag, idrettslag og andre organisasjonar har allereie tatt utfordringa, så det kan bli spanande å sjå kven som til slutt kan kalla seg kjappaste lag over Fikse, seier Torleif Heggebø i Vindafjord Turlag. 

Saman med Etne Turlag, Vindafjord idrettslag og Etne idrettslag, inviterer turlaget i Vindafjord til tidenes første stafett, løp og turmarsj mellom Ølen og Etne, Over Fikse. Startskotet går ved Ølen stadion 29. april, med målstrek ved stadion i Etne. 

- Vindafjord kommune stiller med lag, og utfordrarar sjølvsagt Etne kommune til tvekamp. Blant anna stiller også Omega, Medvind24 Næringshage, MX Sport og Himkok. Alle påmelde lag har så langt rekna med å sigrande ut av stafetten, så me satsar  på at endå fleire utfordrar stiller til start for å ta opp kampen, seier Heggebø. 

Sjå oversikt over etappane nederst i saka. 

Offisiell opning 

I tillegg til stafett, blir det også løp aktiv klasse, og Grannarmarsj for turgåarar. 

- Me reknar med å ha sendt mange Grannar-marsjarar ut i løypa før dei aktive og stafettløparane kjem, så det blir nok mange oppmuntrande tilrop utover i løpet. Over Fikse skal også vera ein folkefest, og me håpar på stort frammøte av deltakarar og publikum både langs løypa og på tribunen ved målstreken, seier Heggebø. 

Løpet skal markera den offisielle opninga av turvegen som allereie har blitt ei svært populær løype for innbyggjarar i begge kommunar. Det blir sett opp buss frå Etne til Ølen i forkant av opninga.

- Vindafjord kommune skal få æra av å opna turvegen, då det var kommunen som starta det heile med ei undersøking som viste at innbyggjarane i Vindafjord ønska seg nettopp turvegar mellom bygdene, fortel Heggebø. 

Ny tradisjon? 

Etne Turlag og Etne IL inviterer også til eige barnearrangement (også for vaksne) i Etne, medan dei ventar på at marsjerande og løparane kjem til mål. 

- Me skal prøva å halda publikum ved målstreken orienterte om korleis det går ute i løypa og varsla når løparane nærmar seg mål. Det vankar pengepremiar til dei kjappaste i løpsklassen og gåvekort til tre utvalde i turklassen. I tillegg til heider og ære vil det raskaste stafettlaget motta vandrepokal. 

Dermed er det duka for gjenkamp til neste år. 

- Me har med oss ei rekkje bidragsytarar, både som sponsorar og på arrangørsida. Det hadde vore umogleg å fått dette til utan dei, og eg trur me saman skal klara å laga ein årleg tradisjon ut av dette arrangementet, seier Heggebø.

Program for dagen