– Vår jobb har vore å lage til straum til rasteplassen og belysning i alle møblar og figurar. All belysning er spesialprodusert i Tyskland til dette prosjektet, og tilpassa og montert av oss, fortel teamleiar i Helgevold, Jan Rune Hoftun.
Han meiner prosjektet har vore spanande og utfordrande, ikkje minst sidan det er noko heilt anna enn å setje opp belysning i eit bustadhus eller ein butikk.
– Dette blir veldig stilig, og det er tøft å ha vore med på det. Det som har vore mest ufordrande har vore all tilpassinga for å få alt til å fungere korrekt, meiner han og legg vekt på at deira jobb har gått via Suldal B&G, som har vore entreprenør på prosjektet.
Innovativ arkitektur frå KAP, saman med servicebygget signert Jensen og Skodvin arkitektar frå 2005, gjer no Ropeid til eit fullverdig turistvegstopp nede i vasskanten, heiter det i ei pressemelding frå Statens vegvesen.
Kultur og natur
Då Sandsfjord bru avløyste ferja mellom Sand og Ropeid i 2015, blei det meste av ferjeleiet på Ropeid liggjande att ubrukt, med sine store asfaltflater og grove massar mot sjøen. Ideen bak den nye rasteplassen var å kombinera rast og kvile med reparasjon av landskapet. Sjølinja rundt den opphavelege holmen blei graven frem og «bandasjert» med betongmadrassar. Madrasslandskapet rommar også små og store møbelelement; krakker og bord, lykter og lamper. Møblane står opp som klynger av kunstige «soppar», laga av materiale frå resirkulerte plastbåtar frå Ryfylke.
– Prosjektet er eit landskapsgrep som viskar ut skiljet mellom kultur og natur. Det kunstige imiterer naturen og det naturlege imiterer det kunstige, forklarer Eivind Gjertsen på KAP arkitektar i ei pressemelding.
Ordførar Gerd Helen Bø i Suldal kommune står for den offisielle innviinga torsdag 3. juni.
– Det å få ein Nasjonal turistveg-rasteplass på Ropeid kan minna oss om historia til staden. Ikkje minst får vi enda ein minnerik stad å stoppa langs arkitekturrunden gjennom Sauda og Suldal, seier ho.
Nasjonal turistveg Ryfylke er viktig for turistnæringa i Suldal og for heile Ryfylke. Det å få ein så fin rasteplass på Ropeid set ein ekstra spiss på opplevinga langs vegen, seier ordføraren i Suldal.
Auka verdiskaping
Laila Steine er leiar i Suldal Vekst, ho meiner Nasjonal turistveg Ryfylke er stadig meir attraktiv for besøk
– Nasjonal turistveg Ryfylke er ein skatt for alle som vil oppleve kombinasjonen av natur, kultur og arkitektur. Turistvegen har medverka vesentleg til auka verdiskaping i reiselivet både i Suldal og i regionen elles, slår Steine fast.
Opninga av Ropeid torsdag den 3. juni byr også på innslag ved mezzosopranen Amelie Aldner og saxofonisten Erik Aldner.