Tittel for årets Næringsgiv er «Blod, svette og klampen i bånn». Den raude tråden er korleis norsk næringsliv og arbeidsmarknad skal klara å kara seg ut frå ei krisetid og arbeida for ny vekst.
Og 28-åringen frå Ølen er ferskaste headliner på konferanseplakaten..
Sidan Heggebø starta på sosiologistudiet ved Universitetet i Stavanger i 2007, har han fordjupa seg i norsk arbeidsmarknad, utdannings- og helsesosiologi, arbeidsløyse og sosial lagdeling.
- Masteroppgåva mi var langt på veg lokalt forankra, der eg undersøkte utdanningsplanar blant 10. klassingar i Etne og Vindafjord. Eg gjorde tydelegvis eit greitt inntrykk med den oppgåva, og blei tilbudd ei stilling som vitskapeleg assistent ved institutt for sosiologi og samfunnsgeografi ved Universitetet i Oslo etterpå, fortel Heggebø.
16. desember toppa han utdannings- og yrkesløpet sitt med å forsvara doktorgraden «Hiring, Firing, and Health: A Cross-National Comparative Perspective» . I dag arbeider Heggebø som forskar på Velferdsinstituttet NOVA ved Høgskolen i Oslo og Akerhus.
Ser seg blinde på CV-ar
- I Noreg er det eit stort fokus på korleis me skal oppnå høgast mogleg sysselsetjing, men me har ein lang veg å gå på dette området. Det er på tida at me rettar fokus på arbeidsgivarane i staden for arbeidstakar, seier Heggebø.
Her trur Heggebø arbeidsgivarsida sitt møte med potensielt nye tilsette kan vera ein nøkkel. Mange arbeidsgivarar ser seg blinde på CV-ar og formell utdanningskompetanse, meiner han.
Og det er på ingen måte noko sjølvsagt samanfall mellom utdanningsnivå og produktivitet på norske arbeidsplassar.
- Me er i ferd med å nærma oss eit punkt der utdanningsnivået kanskje er blitt for høgt, og eg trur mange arbeidsgivarar ikkje klarer å sjå om potensielle arbeidstakarar faktisk evnar den jobben dei er tiltenkt. Mange av oppgåvene ein gjer på arbeidsplassar landet over, kan ein ikkje gjera utan å faktisk ha kjennskap til det som skjer på golvet. Ein må ofte ha arbeidd i felten for å kunna gjera kontorarbeidet som høyrer til, meiner han.
Engasjerer publikum
Med solid fagleg bagasje i tursekken er altså Heggebø meir enn klar for å dra Olalia-publikummet med på å løysa utfordringane norsk arbeidsmarknad står overfor i dag.
- Det blir nok ikkje eit «tradisjonelt føredrag», eg likar best å få publikum med i diskusjonen og utfordra tilhøyrarane mine undervegs, seier han.