- Det er veldig bra, samstundes er framleis situasjonen usikker og eg er spent på kor lenge dette vil vare, seier Askeland som driv sin klinikk i Ølen og var ei av mange bedrifter som måtte stenge dørene 12. mars. Ho håpar denne dugnaden vil hjelpe på slik at smitteomfanget blir redusert. Ho har drive klinikken i Ølen i tre år og er spent på kor lenge det vil gå før samfunnet kjem tilbake til normale tilstandar.

Lågterskel-pakke

Den omtalte kontantstøtta som regjeringa la fram på torsdag sist veke gir bedriftene 20 milliardar i månaden ut mai. Bedriftene som har krav på denne støtta må kunne dokumentere eit fall i omsetnaden på minst 30 prosent, som ein rein konsekvens av den aukande korona-smitten.

Dei bedriftene som er stengt ned av staten treng berre å dokumentere 20 prosent inntektsfall for mars månad for å kunne søkje om å få dekka inntil 90 prosent av faste kostnader. Andre bedrifter får ein dekningsgrad på 80 prosent, i tillegg til ein eigendel på 10 000.

- No kom omsider den lågterskel-krisepakka mange har venta på. Den har låg terskel for kven som kan søkje, rask saksbehandling og effektuering. Ikkje minst bidrar den til å dekke kortsiktige driftskostnadar som ikkje stoppar opp sjølv om inntektene gjer det, meiner Merete Vårvik Matre i Medvind24 Næringshage.

Skaff god oversikt

Minstebeløp som vil bli støtta er 5000 kroner i månaden, og maksimalbeløpet er sett til 30 millionar i månaden. Bedriftene kan få kompensasjon for utgifter som leige av lokale, oppvarming, vatn og avløp, leige av maskinar, rådgjevingstenester som rekneskap eller til dømes forsikringspremiar. Kompensasjonen skal setjast i verk for mars, april og mai. Første utbetaling skal etter planen kome i gang så raskt som mogleg etter påske, søknadsportalen opnar 17. april.

- Det er mange bedrifter i Etne og Vindafjord som vil vere i posisjon til å søkje om denne kontantstøtta. Eg anbefalar uansett alle bedrifter til å bruke dei neste dagane til å sjå nærare på vilkåra rundt kontantstøtteordninga, få oversikt over eige inntektstap og ikkje minst alle sine faste kostnadar, seier Vårvik Matre.