- Eit distriktsfiendtleg vedtak som har gått under radaren

Næringsliv i Distrikts-Noreg har i 15 år forvalta kompensasjonsmidlar til regional utvikling og lokale prosjekt av stor samfunnsnytte. Nå blir midlane kutta av regjeringa, og i staden kanalisert inn i statskassa og vidare mot infrastruktur i byområda.

Av: Aakra, Kari Publisert: 16. mai 2017

- Dette er ein villa politikk frå ei distriktsfiendtleg regjering, som ikkje berre vil påverka næringslivet i distrikta, men også regional utvikling, seier Øystein Matre, styreleiar i Vindafjord Arbeidsgiverforum (VAF) og administrarande direktør i Westcon Yards.

Næringslivet i distrikta har i 15 år motteke refusjonsmidlar for høg arbeidsgivaravgift. Refusjonsordninga har vore tverrpolitisk forankra, og eit distriktspolitisk verkemiddel som skal kompensera for utfordringane ved å driva næring i distrikta.

Næringslivet i utkantstrok har fått refundert om lag 60 % av differensiert arbeidsgivaravgift, og midlane er gitt vidare til lokalsamfunna for å fremja regional utvikling. Som forvaltar av midlane i Vindafjord, har VAF nytta pengane til å utvikla infrastruktur og iverksetja samfunnsprosjekt verdt meir enn 300 millionar kroner i regionen.

I revidert nasjonalbudsjett er ordninga fjerna med eit pennestrøk, og utan reell debatt, meiner Matre.

Under radaren

Dette er saka

Differensiert arbeidsgivaravgift eit distriktspolitisk verkemiddel som kompenserer for ulempene ved å driva næring i Distrikts-Noreg. Det har vore tverrpolitisk semje om denne ordninga.
Samla betalte næringslivet inn 732 millionar kroner i 2016
Til nå har 60-70 % av desse midlane kome næringslivet og distrikta til gode gjennom kompensasjonsordninga
30-40 % av innbetalte midlar har hamna i statskassen.
Ved avvikling av kompesasjonsordninga vil staten nå sitja att med heile potten
På kostnad av distriktsnoreg er det dei store byregionane det nå vil bli satsa på dersom refusjonsordninga fell bort (mellom anna ved at midlane vil gå til infrastruktur i byområda)
Midlane vil ikkje lengre koma verken næringsliv eller distrikta til gode

- Det som var eit særs viktig distriktspolitisk verkemiddel, kjem nå til å forsvinna til byområda på kostnad av regional utvikling i norske utkantstrøk. Me har ikkje funne nokre politiske vurderingar som byggjer oppunder avviklinga av denne ordninga. Så langt har me heller ikkje funne at saka har vore debattert på Stortinget. Det er eit demokratisk problem at departementet her verkar å ha avvikla ordninga utan open politisk debatt, seier han.

I 2016 betalte næringslivet i Distrikts-Noreg totalt 732 millionar kroner i ekstra arbeidsgjevaravgift. Til nå har mellom 60 og 70 prosent av desse kome tilbake til distrikta gjennom refusjonsordninga. Den resterande summen har hamna i statskassa.

- På kostnad av Distrikts-Noreg som til nå har nytta midlane til viktig regional utvikling, vil pengane forsvinna til infrastruktur i byområda i Noreg. Me kan ikkje sjå korleis desse midlane nå vil koma distrikta til gode, seier Matre.

Utvikling for 300 millionar

VAF har formidla desse refusjonsmidlane til meir enn 130 regionale prosjekt innan infrastruktur, regionalutvikling, samfunnsprosjekt og kompetanseheving med stor ålmenn nytte.

- Regionalt har kompensasjonsordninga hatt ei utløysande effekt på prosjekt med ein totalverdi på meir enn 300 millionar kroner. Desse prosjekta, alt frå kulturhus og idrettsanlegg til kompetansehevingstiltak, breibandsutvikling eller gang-og sykkelvegar, ville ikkje vore iverksette om det ikkje hadde vore for desse midlane, seier Matre.

I allereie krevjande tider for næringslivet, kjem avviklinga på verst tenkeleg tidspunkt.

- Me må førebu oss på at det kan bli tøffe år framover med låg aktivitet og høg arbeidsløyse. Næringslivet i distrikta er sårbare, og me er avhengige av ein politikk som kan bidra til å oppretthalda Distrikts-Noreg og næringane her. Regjeringa sitt vedtak om å kutta denne ordninga er det stikk motsette.

Vindafjord Arbeidsgiverforum og kompensasjonsordninga

Vindafjord Arbeidsgiverforum (VAF) har gjennom refusjonsordninga bidratt til ei rekkje omfattande tiltak til gode for både nærings- og samfunnsliv i distriktet.

Regional utvikling

Sidan 2005 har VAF som følgje av refusjonsordninga bidratt med over 70 millionar kroner til meir enn 130 regionale prosjekt innan infrastruktur, nyskaping, regions- og samfunnsbygging.
Midlane frå VAF hatt ei utløysande effekt for ei rekkje omfattande prosjekt til gode for næringsliv og distrikt, med ein totalverdi på meir enn 200 millionar kroner.

Kompetanseheving

Meir enn 9000 deltakararar har nytta seg av kurs og kompetanseaukande tiltak gjennom kompetanseprosjektet i regi av Vindafjord Arbeidsgiverforum.
VAF har som følgje av refusjonsordninga bidrege med 40 millionar kroner til prosjektet, tilsvarande over 80 millionar kroner i verdi for lokalt næringsliv.
Kompetanseprosjektet har gitt regionale bedrifter, frå enkeltmannsføretak til konsern, høve til å auka kompetansen hjå sine tilsette gjennom lokale og tilrettelagde tilbod.
Totalt har det vore arrangert 550 kurs, som har tilført bedriftene auka kompetanse over ei rekkje fagområde.

Kommunikasjon

VAF er initiativtakar til kommunikasjonsprosjektet medvind24.no, og har støtta prosjektet med fem millionar kroner dei siste åra.
Nettstaden medvind24.no er ein omdømebyggjar og ein informasjonskanal for og om det regionale næringslivet.